طعمك... ما بقاش يشبه طعمك
ولا ضحكة روحك... صبحت تشبه ليلة العيد
ولا قلبك قادر يقرا نشيد الصبح معايا بعِلْو الصوت
طعمك...
ما بقاش يشبه طعمك
ولا طعم العالم أصبح توت
ولا ريحة قلب بيوت العتمه بتطرح قوت للبنى آدمين
ولا وش تابوت الروح مفتوح لخلايا الطين
ولا أرض التين وسط الفدادين طرحت عنّاب
طعمك ما بقاش يشبه طعمك
ولا قلبك... أصبح باب سرداب لجموح الخيل
النيل بيفيض ساعة التحاريق... وبيطرح نيل
وعنيكى بتضوى كما القناديل... فى عيون الضىّ
الله على شكل القلب الحى وهوّ بيطرح نور وجريد
والورد بيرقص فى عيونك... ساعة التنهيد
وجع المواتير... عمّال ينزف شعر وأناشيد
والناس عناقيد مش طيّابه
وعيونك لسه بترسم ناى
على خدّ التخته الأوّابه
وانا داير بارسم فى رموشك
ع السور والباب والبوّابه
طعمك ما بقاش يشبه طعمك
ولا روحك صبحت توّابه
ولا عودك أصبح عنّابه بتتشعبط على أوتار الروح
يا عيون كرابيج...
وبدن مدبوح
يا غيطان لبلاب...
وشعار فى كتاب
ووطن مرسوم على ضرس وناب
ومريد بيغنى على الأعتاب ووتر مبحوح
أنا خشبة ف صدر سفينة نوح وانتى السارى
أنا كلمه بتطلع وقت البوح وانتى حصارى
أنا صرخة حب ف أرض الله
وملامحك جيشى وانصارى
يا عيونى... ووطنى...
وثوّارى ف أوقات الضيق
يا طمان القلب من المخاليق
طعم التنهيد.. ما يبلّش ريق ولا يطفيش جمر
والدنيا بقت تطرح حنضل وتوزّع تمر
وانا لسه باقول أشعار للناس فى عنيكى السُّمر
يا رهان العمر ف وشّ ولاد الكلب الدون
أنا نخله وطير وورق وغصون
أنا أرض لمون مش طرّاحه
أنا كلمه ف وش عباد الله
وقصيده وضحكة فلاحه
أنا عاشق والقلب مساحه بتطرح نعناع
طعمك ما بقاش يشبه طعمك
ولا روحك صبحت قادره تساع أوجاع الصبّ
النيل طرّاح
والخيل رمّاح
طلع ابن رباح يدّن للرب
خدتينى شعاع فى ميدان الله... وأخدتك أبّ
والطير عمّال بيلقّط حَبّ من الطرقات
وانا وانتى بدن مغسول بالنور
وشعاع مبدور ع الأنتريهات
وقصيدة حب بتتمايل
وبترقص على جدران الذات
أنا وانتى فَرَح صبيان وبنات بيحبوا الورد
أنا وانتى جريد نبّت فى الأرض طرَح سماوات
أنا وانتى صلا ف وسط الصلوات
أنا وانتى آيات مش مكتوبه
أنا وانتى دراع بيضم دراع...
ووطن متباع فى نهار طوبه
أنا وانتى... ملامح معطوبه ف صدر الأنجاس
أنا وانتى شراع فى قلوب الناس
أنا وانتى... إشاره من الحراس للخيّاله
أنا وانتى حصان... مفطوم على صهد القيّاله
أنا وانتى الخاله أمّ ضفيرتين
أنا وانتى حدود ووجع وصمود
وعلم مفرود على صدر ياسين
أنا وانتى اتنين بيقولوا آمين فى بلاد الله
أنا وانتى شعار
ووطن... وحياه
أنا وانتى بدن من طمى النيل
قنديل وفتيل.. ومطر محاياه
