لسه فاكر ..
جدى كان يطلع نص الليل للخلا ..
من غير سلاح ولا عصايه يهش بيها الكلاب
كأنه فارس رباية ملوك
طبعه شركسى ما يلين زى الحديد
وانا قلبى كان راخر عيل مقروض اوى
يتشعلق بديل الجلابيه بتاعته قاصد خطوته
ينهرنى بنظرة عينيه أترجف ويرجع الحزن يرسّب جوه منّى
أقعد انتظر ..
يركب جزمته ويطير يسبق الريح زى ما يكون عارف مصيره
( الرزق الحلال بالسعى والبركه تكفى ّ )
اخر النهار يرجع مهدود وعرقان ..
يحمد ربنا بعد صلاة العشا ..
يوزع ضحكته على الكل ويخصنى بالمناب الكبير
معرفش ليه ..
!!
جدى كان يقوللى ..
اهلنا مش غجر ولا حلايبه ولا كانوا يزرعوا البرغل
بس سكن المدينه يقسى القلوب مهما كان الاصل طيب
ابوك زى ما تعلم ( كان ) رقيق اكمنه رباية مدارس
امك هيه روخره (كانت) بتفك الخط وتعلمه لولاد الفقرا
يبقى انت لزما تملا العين لما توعى للزمن
بس اياك يضحك عليك ويلفك تحت باطه
وقتها ميبقاش ليك عازه عندينا
ولا فى المدينه ..
ولا حتى عند..
عضم التربه
!!