نقيها بيت كرم لو كان قليل المال
ويكون أساسها عفي زينة وبت رجال
دور الكبير في الخلا بيوعي م الإهمال
يا صاحبي قبل النسب نقي لابنك خال
مين اللي قال مشكلة على قصر أو فيلا
ما تصدقوش انها راح تشفى م العلة
طقم الكلاب اختلف هيجيبوا كلب جديد
و كليب بيشبه عبيد واهو كله م الشلة
اللي بلاه الزمن يتوحش الأفراح
واللي معهش التمن ما يدوقيش التفاح
واللي يقول الحق بيزعل الكداب
واللي يوطي الرقاب ما يلومش ع الدباح
يارب جيت اشتكي والجته معلوله
وهمومي زادت قوي فاجعلها محلوله
وابعدني م اللي كفر واجعلني م الكومال
دا اللي كفر قال يد الله مغلولة
في زمنا صبح الجنيه يقدر يذل رجال
ويعلي ناس الوطا ويبدل الأحوال
واللي بحرامه شبع فالنار يدوق العنا
من ميتى كان ربنا بيقيس بكتر المال
ودعت فرح الزمن وبعت لي أحزانه
والحلو جيت اشتري قام سك دكانه
وعيت من اللي جرا ولا ضهري يوم اتكا
حتى الفراش اشتكى ما حملش عيانه
ياقلبي سيب البشر سيب الكلام والنبر
وامشي ف طريقك عدل اعمل حساب القبر
وارضى بقضاء ربنا لو يوم بلاك الزمان
دا اللي يدوق الإيمان يحلى له طعم الصبر
جواك وسكن الوجع أما الفرح براك
ولا أخ زين يسندك ولا أخت ليك براك
مسكين يا ولد الهم والشوك ف غيطك طرح
جمل الحرامي رمح وجمل الشريف براك
صلوا ع المصطفى دي صلاتهخ منعاني
راح تلقى فيها الشفا الفرح مجاني
واللي ما صلى خسر لو عربي أو اجنبي
وحياة جمال النبي صلوا عليه تاني
أول ما غاب الكبير عملوا العيال عيطة
الحزم يبقى بعدل مش جعجعة وزيطة
وه ياللي عامل ولي بكره عليك الدور
ده البقرة لما تثر بهد مية حيطه
سايق عليكي الهوى خفي الجلع خفي
لون الخدود استوى والنهد متعفي
ما تحني يوم ع الجدع واديله مره معاد
محلا جمال الفخاد كندوز ومتشفي
يامايه ليه القسى ما تحني لاحبابك
وما تزعطيش الوفي وتضايفي من سابك
احنا اللي شوفنا الشقا فيكي وحيلنا اتهد
وزرعنا بإيدنا الورد وبناكل في ترابك
راجل بلاه الزمن لبس الحرير كلاف
وفقير ماعهش انما لو جاله ضيف كلاف
الدنيا ما تعرف اصول في السعر ماليها تمن
واللي عطاه الزمن كان في الأساس كلاف
و بلادنا كيف الترع فيها الشعوب نايمين
الفرخ فيكي ظهر أما الأسود نايمين
حابسة ولاد الأصول وبتعلفي في الغجر
ياللي دبحتي البقر عايزة الحليب من مين
دمعي بقرايب ملا مين اللي بكاكي
صبحت قصة وعلم والندل حكاكي
ولا شوفنا فيك دكر ولا شوفنا فيك نتي
قلعوا الحريم الزي ورجالها ما تكاكي
قال الشيطان يابن آدم أوعى تسمع حد
واقفل ودانك قوي بس سك بجد
تسمعني ليه وانت عارف إن انا ملعون
وعالم ان يوم بناك بتهد
جمل المحامل برك بعد اما جملنا
حين كان معانا الأدب والمال جملنا
اهو كله راح وانتهى يمايا أيه العمل
طب كيف يسير الجمل وقتلتي جمالنا
مكتـوب علينا القسى ميتى القسى .. هيلين
مين اللي وصى الوجع قال للوجع . هيلين
وصاحبنا ناس مش ناس كان فرعهم مايل
نســيوا الجمـايل وكانوا في قلعنا ... هيلين
فيه ناس قليلة الأصل وابن الحرام . وكلوه
واهي دنيا زي السبق واللي رمح .. وكلوه
والحــظ زي الخيل كان للغشــيم ... كلاب
شوف سبع من غير ناب حبة كلاب وكلوه
سـايق عليك النبي للهلف ولا ... تديشي
وما تعلفيش في الردي وتزيدي تلطيشي
الكتف مال م الهـم وما دوقت مرة نعيم
نفسـي أشـم النسـيم ليه مقفله ... شـيشي
عماله تدي الردي و بجهله ... فلسها
عليها داس وافترى من دوسته فطسها
لبس الجبان طربوش لكن أساسه فطيس
واللي حكمها خسيس ينفعش كناسها
يابس ياغيط البلد ويا القصب والشام
والكلب مهما علي اصله العوا والشام
يابلادنا مالك كده مفكيشي راجل بان
لبس الحريم عريان وع الكتاف وشام
عبله صابوها الرمم من بعد عنترها
واه يااللي عامل أسد ومفكش عنترها
فتح الجراح يابلد الدون وعامل بطل
قاعد مع اللي قتل ما سألش عنترها
