السبت 13 يوليو 2024 - 05:06 صباحاً - القاهرة

     

 

 

               

 

  أحدث الأخبار

 

 

  الأكثر قراءة

 
 
 

ما أسباب تراجع الأغنية

  ازمة صوت

  ازمة كلمة

  ازمة لحن

  غياب دور الدولة في تبني أصوات جادة


نتائج

 

 
 

الرئيسية ابداع "قطر خمسه وتلت" شعر : وائل السيد .. المنيا

 

 
 

"قطر خمسه وتلت" شعر : وائل السيد .. المنيا

  الأربعاء 12 يونيو 2024 10:41 صباحاً   




 

في قطر خمسه وتلت

فرد النهار الطول

ع الكُرسي فَ اتمدد

يا بَيّاعين الفَرَح

الليل فِ تاجي سرح

و نِتَاجي مستشهد  

فارش بتاع الشاي

النَصْبه فوق حجري

أنا خُفت اقوم أجري

يتكَب عَشمُه آهات

 كان الكلام  سري

كان السكوت خِلّي

دلوقتي أنا فِ سري

غيران من الأموات

يا عمنا الكُمسَاري

الحزن طبعه ثري

قطع  التذاكر/ شق

يا عمنا الكُمْسَاري

وزّع تذاكر ضحك

أدّن يا ديك بدري

دا احنا حزانه يابوي

ع الوش خاتم صك

طرح الربيع شواكيش

فِ العضم فَ اتكسر

مين اللي ها يأثر

ع الشمس  فَ تزورنا

مين اللي زوّرنا

وكتبنا م العايشين

ضحكت سنانه قوام  

فَ اتوزعت مساكين  

يا مدّاحين النبي

سيدنا الحبيب الزين

انا تُهت بين شَطين

مولود فِ زي ملاك  

متباع كما استهلاك

على يأس واد إنسي

مَنسي كما عصفور

مرمي غريق ع الشط

لعبه لحماده يا ست

و ده أول استفتاح

الفرح له مفتاح لكنه

ضاع مني

و شقايا واد جِنّي

واقف و مستني

إني أقول مَلِيت

الراحه حُضن وبيت

 جُوايا ميت إنسان

قطر الفقارى جبان   

ماشي  بدون أُسطى

قسم الرغيف كَسْره

بالعدل ع البُسطا

ليه الكلاب باسطه

ع الكهف مِيت ذِلّه

النخله مش مأوى

و الجذع  م الأيتام

انا دوري كان بدوي

و بَنُولي ألف مقام

حُضن الرصيف

أغراب

قام نزّل الرُكّاب

سُنّه وفرض وطوع

كان الخروج ممنوع

كان الدخول ممنوع

كان الوريد مقطوع

م الهمس و النبره

سايبيني فِ  الحَضْره

والذكريات خضرا

البَشره مش سمرا

ده الحزن قلبه جعان

فاستنى فوق وشي

يا قطر روح امشي

هامشي يموت

بِشويش

رُكّاب تموت  بقشيش

والعُمر أصله شاويش

لابس هدوم جُوعنا

و رجوعنا  بنت بتول

بتنادي من حوتنا

امتى تحاوطنا بالفرح

 كام عدرا

لسه الكتاف قادره

بالقُدره و التكبير  

الهَم له جناحات

الهم له مناقير

و احنا  الضلوع

والريش  

فَليحيا ألف  يهوذا  

مليون يهوذا يعيش

العمر قُدس بياض  

و إزاي يصيبه سواد

فَيصلّي فيه بخشوع

الحبل مش مقطوع  

ما دام  بتاع الشاي

ما سألش رزقه إزاي

و بيسرح رغم الجوع  

بقلب أبيض  برئ

لو كان القطربطئ

الحلم لسه يَسُوع