.......
مادمتى انتى مالعبتيش
معايا
الحجلة والسيجا
ف ماتطلبيش أدخل معاكى كافيه
واتدرب على الويجا
فلايجوز
نجمع مابين جيل اتربى
على فيروز
وبين جيل
بتاع أوكا وأرتيجا
....
أنا عمرى رايح
وانتى
عمرك جاى
أنا شمسى غابت
وانتى كلك ضى
إحنا اللى أول جهدنا
كيلو
وانتوا اللى قستوا الجهد
بالجيجا
ماهو يستحيل نجمع ماببن
الشمعدان
و النسكافيه فتلة
مع جيل فاطر
طبيخ مغلى
مع شاى بتحويجة
.....
سهمك صحيح جامد
ولكنه مايصبنيش
عدى كتير قبلك وماجتشى بالتهويش
إحنا اللى جيلنا جامد أوى وسادد
وانتوا اللى جيلكم
ماشى بالفيجا
.......
ممكن يكون رمشك بالف سلاح
لكنى ماوعدتكيش تلاقى
جنب منى براح
أنا شعرى كله ابيض من برة
لكن مشاعرى كلها ٱحاسيس
وانتى جمالك حلو بالمرة
لكن يا ستى الفايدة
فى التخليص
ممكن يكون الرمش دا عيرة
والخدود ماسكات على كريمات
على دوكو وصنفرة ونيلة
حاجات تضيف للوش تحميره
على معجون وشغل ميك ٱب
روحى ابتدى عمرك مع حد من سنك
ولو عوزتينى تلاقينى
أكون لك أب
كل البنات بتقوللى يا عمو
وانتى اللى جاية تصحى أوجاعى
كل محاولاتك معايا
بدون فايدة
كل السكك مقفولة فى الٱخر
يعنى بلاش أفلام بدون داعى
إحنا اللى أكلنا المش وبدوده
وإحنا اللى كانت سمنته بلدى
إحنا الزمان الحلو والراكية واللمة إحنا الدفا والوفا
والشىء ومردوده
إحنا الكانون والأكل متخدع
إحنا اللى كان كل الجيران فى الفرح نتجمع
لو حد كان تعبان تلاقى الكل يتوجع
إحنا اللى كنا على طبخة واحدة
كلنا نشبع
إحنا الأصالة والخير على أصوله
احنا ولاد الأمهات والراجل المجدع
احنا ولاد الطيبين والطببات العاقلة ورزينة
احنا اللى عشنا ع الرضا
فاسكتنا وارضينا
وانتوا اللى تايه حلمكم بين شرم وما رينا
إحنا بيوت العز بالطينة
وانتوا اللى جيتوا
وعشتوا فى مساكن
وانتو حياتكوا ماشية بالشاحن
لكن ف عز الشغل
يجيله تهنيجة
فلا يجوز
نجمع ما بين فيروز
وبين أوكا وأرتيجا
فمتطلبيش أدخل معاكى كافيه
واتدرب على الويجا
مادمتى مالعبتيش معايا الحجلة والسيجا
