عارف بيقولوا الشارع متغمس باللون الأحمر
وكمان مليون مليون دبدوب حاضن ف قلوب
مبتعرفش الألوان
عارف بيغنوا ( الأرض حرير )
والناس من غير هيليوم بتطير
بيقولوا تذكرة المترو وترام الرمل
زى عنيه تمام
وجناين كل الناس حتنبت ورد يموت فى البرد
والبور حيثور يطرح حرمان
بيقولوا خلصت على دورى الشيكولاته
واتفرقع آ خر بالون
بيقولوا الفرحة بحجم البحر والحزن كمان
بيقولوا اليوم ده أساسا خدعه
لاجل القلب يبان
وانا جد رميت القلب زمان
وف ذكرى اليوم الى رميته
بستنى الشمس تلون قلبى
يطلع لى فى قلب القلب أمان
لكن ياخسارة يزورنى الليل اسود لونه غير الألوان
واحلم لو قلبك يدينى تذكرة المترو أحضنها وأنام
واسمعهم بيقولوا الشارع متغمس أحمر
وانا حتى فى حلمى مفيش ألوان
#وفاء_بغدادى
عارفة عيد الحب بدعة
الضِلة الموروثة
