.......

بركعتين المحبه جنب المقام .. سبحان الذي لاينام .. سبحان من بدل الكوابيس أحلام ..وجوز ديابه فى غابه بفردين الحمام .. وأرض بور ضلمه بسما نور دايم ..أنا كنت صايم دهر ماعيشته .. زي اللي رافض عيشته .. زي اللي عايش غريب .. مسكون بالشوق لبلاده .. ولما جه معاده .. حزم أشواقه وطار .. منين ياغريب .. -من الأراضي البكر .. ولفين ياغريب .. _ للأراضي الحكر .. تحت خيمة ربنا الزرقا .. الخلق حتما مفارقه .. واللقا تساهيل ..

أما بعد ..

من طلتك ياغريب .. لطلعة المحمل .. وانا من المحاسيب .. وروحي تتحمل  .. بس انت شاور فى المنام نوبه .. ولا تعالى فى ركعتين التوبه ..  على روحك سلام .. ملا روحي كلام .. عنك وعني .. فى ليله من لياليك الكبيره .. درويش هنا من بدري .. حضر حضره .. زرع شجره .. عاش يناجي المولى .. ويصلي ع المصطفى .. شارب من بير عسلها .. كاسين بالشفا .. على عتب الحجاز .. رقص المجاز .. تلات شهور ماشي ..على فين وجهته ..وتراب دهب عرقان على جبهته  ..ماشي بمحبته .. بس الزمن ثبته.. وقال له .. طلع اللي فى قلبك .. نزلت بشر بالكوم .. اللي من كايرو .. واللي م الأشراف .. واللي من شبين الكوم .. نزلت دموع محروم .. نسوان أرامل .. وطفل عامل .. ودع ع الرمل متسطر .. وانا كنت متوتر .. وبعضي متبعتر .. وروحي شقيانه .. تطاردني ديانه .. تطاردني دبانه .. باجري من ضلي واجري م الهجانه .. اشبط فى سنتي الأمل .. واغرق فى شبر حنان .. حارق تلات ورقات .. وبافرك الحكايات .. على وراك العذارى .. مدد يابو الحيارى ياغريب ..طمني .. عنك وعني ..وعن أهل السويس .