هل انا بينى وبين الموت خطوتين

ولا انا دخلت الموت بخطوتين

مين اللى جنبى دول

احياء ولا ميتين؟؟

انا عندى كام سنة

اربعين

ولا واحد واربعين

كام نفس خرج منى

ميت مليون ولا مية وخمسين.

يااااااااااه

كل دا انفاس

كل الانفاس دى راحت فين؟؟؟

...........

انا ميت ولا حى

جوايا واحد بيتمشى

يفطر ويتغدى ويتعشى

يفرح ويصرخ ويتكلم

يحلم ويتألم

ساعات يكون بركان

وفى لحظة يسلم

طول عمرى مش فاهم منه حاجة

وساعات التجلى اتعلم

هو الواحد ممكن يكون عايش بتنين

جسم فى جسم

مين اللى جنبى دول

احياء ولا ميتين

.................

انا

ايمانه متوتر وقلقان

ساعات يكون مافيش

وسعات قلبه بالايمان عمران

وساعت شبعان

ساعات يصحينى من احلى نومة ويقولى جعان

................

اقوله يا عم الكل باع بيع

يقول لو بعت قضيتى مش حابيع الانسان

اقول له انت جنسيتك ايه

يقول فنان

قوم اعمل لنا كوبيتين شاى

مرهق وتعبان استنى شويتين

قوم على ما اصلى ركعتين

مين اللى جنبك دول الناس دى

احياء ولا ميتين

................

دكتور

بطنى حا تتفرتك

جوايا واحد صاحى ليل ونهار

كل وا اجى انتحر

يقاوم الانتحار

وطول الوقت بيقطع جوايا بمنشار

ويصحينى من احلى نومة ويقول لى حضر الفطار

اعمله طبق فول وقرصين طعمية واخرط الخيار

وافضل ادخل الاكل فى بقه علشان يوصله

واول ما يوصل الاكل جوفه يتحول لنار

دكتور قالى الكولون

ودكتور قال روح اكشف نفسانى

انت مجنون

..............

اعمل ايه؟؟

هل كل انسان ماشى بانسان

دين قال جدا النفس الامارة

ودين يقول دا الاسير

ودين يقول لك شيطان

عايزك تقتله يا دكتور

بس فى حنان

قتل ما احسش بيه

علشان ما اصرخش واسمع الجيران

وجيرانى يا دكتور

الملاك فيهم حيوان

...........

اقتلهولى يا دكتور

عايز ابقى ماشى فى الشارع

زى اى حمار

لا فن ولا حس ولا احساس

ولا فكر ولا اشعار

تضيع الناس وتروح فى ستين الف داهية

وتاخد معاها الناس

عايز ارجع اعمى الدماغ والقلب

لا وعى ولا علم ولا كراس

.......................

صدقنى يا دكتور

انا جواية انسان

والكارثة يا دكتور انه فنان

انسان مخلوق فى الدواوين والكتب

والروايات

ابن الناس وللناس

احياء واموات

اقتله يا دكتور

نزل جسمى من جسمى

نزله وانا ادفنه

كل الناس اموات

....................

تخيل يا دكتور

خد عمرى وراح يحارب بيه

قمت من النوم

ادور على عمرى مش لاقيه

لقيت عمرى ضايع فى السنين

والسنين تايه فيه

دكتور قالى اعمل صلح معاه

علشان تعيش لازم ترضيه

................

قلت يا دكتور

لا انا فهمه ولا هو فهمنى

وفى عز ما انا باكلم الناس

الاقيه بيكلمنى

ولو ماردتش عليه يخاصمنى

ويعاملنى باحتقار

يخنقنى

كل ما افكر انتحر

يقاوم الانتحار

..................

كل يوم

اسمع الناس تتكلم عليه

اللى يقول بيكرر نفسه فى الشعر

واللى يقول عبقرى شعر

واللى يقول مش شاعر واللى يقول مش عارف ايه؟؟

هو مفهمنى انه شاعر كبير

وعلشان يثبت لى

جايب لى شوية تافهين زيه وملفوفين حواليه

يتكلموا فى الشعر والقصة ومش عارف ايه

............

وساعة

ماتجى له القصيدة يبقىيوم اسود

افضل اعمل شاى فى قهوة

وقهوة فى شاى

رايح جاى

لحد مايطلع النهار

قال ايه الشاى والقهوة بيجبولوا وحى الاشعار

وبعد ما يكتب ينشر

ويحاصروه. وانا اللى اشيل الحصار

هم يحاصروه

وانا اعيش وراء الاسوار

اقتله يا دكتور وخلصنى منه

لا الم ولا وجع ولا ناس ولا افكار

وان كان على دواوينه

حاولع فيها

اللدواوين اللى الفها واللى شريها

وخانق البيت بيها

كل كلمه كتابها

حارميها

واشترى الدنيا التانية

دنيا الجهل انا حاشتريها

.....................

ولا اقول لك

اقتلنى انا وسيبه هو يعيش

هو طايش

انا ماليش فى الطيش

ساعة ميت

وساعة عايش

وساعت مافيش

ويلطشوا فيه وهو يلطش فيهم تلطيش

..........

خلنى منه يا دكتور

حزنه عامل زى المية المعدنية

حزن سخن بيفور

الاقيه طالع من عنيه

طابورين من الدموع فى طابور

وقبل ما القط دموعه بايديه تسقط فى شعر على السطور

............

انا اقتلت يا دكتور

ولا هم اللى قتلونى

انا ذبحتهم يا دكتور

ولا هم اللى ذبحونى

ساعات الاقيهم بيكلمونى

اقوم من النوم مفزوع اغسل فى عيونى

الاقيهم واقفين تحت البيت

تحت البيت بيستنونى

ع الباب على الشباك

مالين الشوارع

ورا جفن عيونى

..................

الاقى اللى جوايا

مرعوب وبيرتجف ومذعور

ابقى مش عارف

اهدى فيه

ولا الحقى دموعة اللى ملت الشعر على السطور

وافضل اولع له سجاير

علبة فى اتنين

مين اللى جنبى دول

احياء ولا ميتين

انا برة الموت

ولا دخلت فيه بخطويتين