ممكن دلوقت
اخش الحمام امارس العاده اليوميه ..
كل يوم فى نفس الميعاد بالظبط ..
بعد العصر على طول ..
مراتى راحت عند امها والعيال معاها
الباب مفتوح
Cd عمر خيرت خلفيه روعه
تراك جديد لتامر كروان وراجح داود ..
انا جاهز دلوقت ..
دى سيجارة ديناميت ونص علبه سوبر
دى جريده مستقله
دى مجله ادبيه ..
ده كتاب جديد اشتريته من المعرض اللى فات ولسه مخلصتوش
انا دلوقت مستعد ..
ممكن دلوقت ابتدى ..
امارس الفعل ..
بمنتهى اللذة ..
جايز ما يحصلش
ان مراتى تروح عند امها وتقعد فى البيت
تشغل الحمام فى الغسيل
وبلسم تعمل مهرجان فى الصاله مع اخوها
فأبتدى امارس عليك قهرى
وشك دم..
كنت بتحلق دقنك ولا بتنحت فى الصخر
مراية الحمام مكسوره مش باين فيها حاجه
لكن فيه بقعه تحت رجليك بتوسع
خللى بالك
مش لازم تغرق ..
مش لازم تموت ..
مسموح لك تضحك أو تعيط والباب مقفول