الخريطة
مش خطوط ممدوده ع الحيطة
بألوانها البسيطة
اللى أزرق .. و اللى أصفر .. و الى أخضر
الخريطة .. هى عالم م الخلايق..
خالقه خالق..
بالمحبة .. لجل يتعمر و يكبر
بس بالجور .. أفسدوه
دخلوه .. صالة قمار
لعبة ... لكن .. للكبار
غطوا بيه كل الحيطان
و الرهان .. كان من نصيبنا
يلعبوا على منطقتنا
يرسمونا .. يقَسمونا .. يشكلونا من جديد
يسرقونا .. يهبشونا .. يكلبشونا بالحديد
و احنا عالم .. موجوعين
غرقونا فى الهموم من سنين
غرسوا شوكة و سمموها ف ضهرنا
أثرت على كل حتة فى جسمنا
أثرت على الأخوة .. فى دمنا
كل واحد مننا .. بقى حالته حالة
اللى رافض أنه ينتج..
و اللى قابل يبقى عالة
و اللى كان عايش لنفسه..
اصطادوه
و اللى كان الأقوى فينا..
خافوا منه .. و عذبوه
قطعوه .. قدام عنينا
و اما كان الدور علينا..
لعبوا .. ع النية البريئة
كانت الأحوال رديئة و الشباب متعذبين
اللى قاسى الذل .. م الناس الأكابر
و اللى عايش و يا أهله فى المقابر
و اللى حاصل ع الشهادة .. بس عاطل
و اللى مش عارف يخطى بالكفاءة
بس شايف غيره طاير .. بالحدائة
واللى قرر انه يرحل وللا يقبل ى حاجة
واللى عازم انه لازم يوم يغير كل حاجة
ثورة كانت فى الصدور
و القلوب جوانا جمرة
قاموا دقوا ع الطبول
و استفادوا من غضبنا فى المؤامرة
أخدوا حبة من ولادنا .. دربوهم
ع المواقع .. أطلقوهم
و الجماعة الإخوانية .. مولوهم
و العقول الإرهابية .. سلحوهم
عشموهم .. بالإمارة الإسلامية
و الضحايا..
والضحايا من شعوبنا العاطفية..
انضموا ليهم
فكروا الجنة و نعيمها .. بين ايديهم
و اما شافوا النار بتحرق .. كل حاجة..
حلوة فيهم
ندموا على كل اللى فات
وقفوا خلف جيوشهم الصامدة..
و طلبوا المعجزات
و الخريطة
مشخطوط ممدودة ع الحيطة
بألوانها البسيطة
اللى أزرق .. و اللى أصفر .. و اللى أخضر
ضافوا ليها لون جديد .. بالدم أحمر
لعبوا على كل الكروت
فكرونا خلاص هنيأس أو نموت
أحنا أصحاب الحضارة الإنسانية..
و الرسالة الربانية .. و التاريخ .. لازم نقوم
حتى و ان لفوا حوالينا .. حزام ملغوم
لسه لون البحر فوقنا .. و ع اليمين
و اللى راهنوا اليوم عليه..
صعب و مهين
كل دين راح يدفعوه
واللى لازم يعرفوه
ان آخر كارت .. جايز يلعبوه
كل اللى كسبوه .. فى لحظة يخسروه
أصل الخريطة
مش خطوط ممدودة ع الحيطة..
بألوانها البسيطة
الخريطة .. ليها واحد
خالق الأكوان و شاهد
ع اللى خلقه بيعملوه
ع اللى خلقه بيعملوه
