الجمعة 29 مارس 2024 - 02:22 مساءً - القاهرة

     

 

 

               

 

  أحدث الأخبار

 

 

  الأكثر قراءة

 
 
 

ما أسباب تراجع الأغنية

  ازمة صوت

  ازمة كلمة

  ازمة لحن

  غياب دور الدولة في تبني أصوات جادة


نتائج

 

 
 

الرئيسية ابداع {تربيعات منحرفة} شعر : حلمي ابراهيم / المنصورة

 

 
 

{تربيعات منحرفة} شعر : حلمي ابراهيم / المنصورة

  الثلاثاء 19 أكتوبر 2021 12:16 صباحاً   




١

رمسيس وخوفو كتبوا التاريخ ريشة وهرم

وابوالهول حارس شعاع الشمس خطوة وقدم

لو كنت باتعاير بفرعون موسى قبل الغرَق

انا ابن إخناتون ورسالة التوحيد والكون عدم

٢

ولسة "السيدعمرمكرم" نقيب للأشراف

ولسة "شيوخ الحِسبة"واخدينها وصاية

يجوز الصورة متّاخدة بدون أوصاف

يجوز فروق الوقت ماهواش معايا

٣

رسّيت علينا المزاد وفيه مازاد عنى

وكام " يزيد" واقفين ولا مزيد منى

سفكوا دم "الحسين" ندهوا على

 "حمزة"

رِجِعِ  الصدى عمى جُرحك بيألمنى

٤

بالف جرحى بشاش وشاشى وجرحى متعقم

عقمت جرحى وقلبى جراح بتتهكم

ياجراح قلبى ياللى رسوم بتتحرك

عملتى "فن تشكيلى" وقالوا الفن متحرّم

٥

وفتحت رابط قلبى اللى مقفلتوش وداريته

وتَكة يمين وتكة شمال على اللوحة لتثبيته

لقيت اللوحة مرفوعة ورسم القلب متعطل

وجارى الكشف والاصلاح ويُعلن بس توقيته

٦

بالف وادور على همومى واقف طريق مشاركتها

ولما باضيفها ع العامة تضيفنى هىّ على شيتها

وشاتى وشيتها بيعلّق

وباسوورد الحياة ماشى ومش رافض صداقتها

٧

وفردت قلبى وتنيته على ايدى بكام قبضة

وقبضة قلبى معروضة وشركتها لاهِىْ تابعة ولا قابضة

دخلت بسهم وسعر السهم مش مطروح فى البورصة

وبورصة قلبى مضروبة وفتحة وقفلة على نبضة

٨

داويت جرحى داويت جرحك مفيش فى الجرح تسويّة

جروحى آهات بتتعاهد وقلبك خدها تسلية

يروح على قلبى يتسكّع يقدم خطوة ويأخر

وقلبى يلم فى جراحه وقضى العمر تمشيّة

٩

زرعتوا القلب فى الصحرا وجو الصحرا بيلفّح

وقولتوا عليه بيتسوّى ويتعلم ويتصفّح

فجفّفتوه  بـرغم  الـرى

ع الحامى

وفاتكم انه متشبّع وح يشقّق

وح يرشّح

١٠

وصار امتداد "رأس الرجاء" صالح

وصار  الليل مرافقه نهار ماهوش أعزب

صحيح النوم باعتلى رسالة نتصالح

لكن بحّارة واقفينها ف "باب المندب"

١١

وكتبت كلام مخاصم بعضه وفجأة لقيته متصالح

سهانى وخَش على بعضه وخد شطرة من امبارح

ولما سألته عن فُعله قال فوت علينا بكرة

كل الطيور سارحة ودايرة تلف ع المالح

 

أخبار اخرى فى القسم