بالرغم اني مابقتش بااقدر اكتب تعازي لانها بقت بتتعبني نفسيا وبااحاول اتجاهل الموت اللي محاصرنا من كل حتة .... لكن انا قررت اكتب عن الحلاق اللي ناس زعلانه ان فيه ناس مهمة كتبت عنه ايوة انا هااكتب عن الكوافير الحلاق المحترم محمد الصغير وانا عمري ماكنت من زبائنه ولا شفتة الا مرات قليله ، هو راجل عصامي و اتعلم في صالون خالة اللي كان حلاق برضة واللي كان راجل مهم ومحترم وطلع من تحت ايدة الحلاق الكوافير( غريب ) وده اللي انا كنت بااسرح عندة وهو الاهم في تاريخ مصر لأنه كان اول كوافير مصري قدر ينافس الخواجات وتربع علي المهنه وكان شاطر ومحترم برضة جدا وده اللي سرح شعر مرات كيسنجر و مرات كارتر و اللي جيهان السادات خدتة معاها في كامب دافيد . ومحمد الصغير اللي معاه اعداديه او ممعهوش !! فعلا قدر يطور من نفسة ويعمل نوع صبغه مافيهوش مواد كيماوية ويعمل شركة عالمية ويعلم ولاده احسن تعليم وقدر يفيد بلده وناسة في حاجات كتيره والراجل ولا سرق حد ولا خد ارض من حد ..... دة راجل اخلص في مهنته واحترمها فأحترموه الناس ، وانا مش فاهمة ليه الاحتقار من بعض المتثقفين والمتأسلمين لأحتقار اصحاب المهن ويستخسروا فيهم انهم يبقوا معروفين ومهمين أو ينالوا في المجتمع مكانه محترمة ، دة لوالعامل اللي بيكنس الشارع اشتغل بضمير واحترام لمهنته واحترمناه يبقي حاجة عظيمة وقدوة ..... ان احتقار الاعمال البسيطه والمهن اليدويه والتجار بيضرب المجتمع في مقتل ؟؟ مافيش مجتمع حضرتك كله مهندسين ودكاتره ومديرين .... ارحموا نفسكم وارحمونا من العبث واللوكلوك السخيف وافرحوا بالناجحين في كل المهن .